नारायणी पब्लिक स्कुलका छात्रा अनुष्का र प्राश्नाले ल्याए ४ जिपिए

भरतपुर – नारायणी इङ्लिस पव्लीक स्कुल भरतपुर–११ ले यस वर्ष पनि एसईई परीक्षामा उत्कृष्ट नतिजा हासिल गर्दै लगातार सफलता कायम राखेको छ।स्कुलकी छात्रा अनुष्का नेपाल र प्राश्ना सुवेदीले ४.०० जिपिए (GPA) ल्याएर विद्यालयको गौरव बढाएका छन्। दुवैजना सानैदेखि मेधावी विद्यार्थीका रूपमा चिनिएका थिए।

विद्यालयका प्राचार्य बेदराज न्यौपानेका अनुसार, गत वर्षहरूमा पनि विद्यालयको नतिजा उत्कृष्ट रहँदै आएको थियो। उनका अनुसार, “लगातार तीन वर्षदेखि हामीले एसईई परीक्षामा उल्लेखनीय सफलता हासिल गर्दै आएका छौं, यसपटक पनि त्यो रेकर्ड कायम राख्न सफल भयौं।”

यस वर्ष एसईईमा सहभागी ७२ जना विद्यार्थीमध्ये धेरैले उच्च ग्रेड ल्याएका छन्, जसले विद्यालयको शैक्षिक गुणस्तर र प्रतिबद्धतालाई पुष्टि गर्छ।नारायणी इङ्लिस पव्लीक स्कुल भरतपुर–११ मा अवस्थित छ र पछिल्ला वर्षहरूमा चितवनको शैक्षिक क्षेत्रमै उत्कृष्ठ स्कुलको रूपमा स्थापित हुँदै गएको छ।