जैमिनी २ मा पाठेघरको क्यान्सर विरुद्दको एचपीभी खोपको अभिमुखिकरण कार्यक्रम सम्पन्न

बागलुङ – पाठेघरको क्यान्सर विरुद्दको एच पी भी खोप अभियानको अभिमुखिकरण कार्यक्रम सम्पन्न भएको छ।जैमिनि २ दमेकमा वडा स्तरिय खोप समन्वय समितिका सदस्य तथा अन्य सरोकारवालाहरुलाई अभिमुखिकरण गरिएको हो ।

खोपको महत्त्व र समुदायका किशोरीहरूलाई खोपको फाइदाबारे जानकारी दिएको दमेक स्वास्थ्य चौकीका प्रमुख हेम कमल क्षेत्रीले जानकारी दिनुभयो । उहाँका अनुसार माघ २२ गतेदेखि सुरु हुने एचपीभी खोप अभियान अन्तर्गत ६ देखि १० कक्षासम्मका ८७ जना किशोरीलाई खोप लगाइने बताउनुभयो ।

यो अभियानले किशोरीहरूको स्वास्थ्य सुरक्षा र भविष्यमा पाठेघरको क्यान्सर जस्ता गम्भीर रोगहरूबाट बचाउन महत्त्वपूर्ण भूमिका खेल्नेछ ।

अहिले महिलालाई हुने पाठेघरको मुखको क्यान्सरबाट जोगाउने उद्देश्यले किशोरीहरूलाई एचपीभी नामक भाइरसविरुद्ध उक्त खोप दिन लागिएको हो।

नेपालमा पाठेघरको क्यान्सर महिलाहरूमा हुने क्यान्सरमध्ये शीर्ष स्थानमा छ भने महिला र पुरुष दुवैको गणना गर्दा पनि फोक्सोको क्यान्सरपछि दोस्रो स्थानमा छ। पाठेघरको क्यान्सर प्रायः ह्यूमन प्यापिलोमाभाइरस (एचपीभी) का कारण हुने बताइन्छ। तर यसलाई खोपले रोकथाम गर्न सकिने क्यान्सर मानिन्छ।