भरतपुर भ्रमण वर्षको पूर्वसन्ध्यामा धान रोपाइँ महोत्सव

भरतपुर । भरतपुर भ्रमण वर्ष २०२४ को पूर्व सन्ध्यामा भरतपुर महानगरपालिका वडा नं ९ स्थित त्रिपुरेश्वर कृषि सहकारीको जग्गामा धान रोपाइँ महोत्सव गरिएको छ ।

कार्यक्रमका प्रमुख अतिथि भरतपुर महानगर प्रमुख रेनु दाहालले भरतपुर भ्रमण वर्ष २०२४ को पूर्वसन्ध्यामा गरिएको धान रोपाइँ महोत्सव गरिएको बताइन् । प्रमुख दाहालले मध्य नेपालको सुन्दर सहर भरतपुर महानगरपालिकाको अवलोकन गर्न पाहुनालाई स्वागतसमेत गरेकी थिइन् । बाजागाजासहित भएको महोत्सव कार्यक्रममा हिलेदौड तथा दहीचिउरा खाने कार्यक्रम पनि भएको थियो ।

कार्यक्रममा उपप्रमुख चित्रसेन अधिकारी, नरेन्द्रकुमार रानालगायतले मन्तव्य दिएका थिए । कार्यक्रम भरतपुर महानगरपालिका कृषि तथा पशुपक्षी महाशाखाको आयोजनामा भएको थियो । त्रिपुरेश्वर कृषि सहकारी संस्था सहआयोजक रहेको थियो । कार्यक्रममा विभिन्न स्कुलका विद्यार्थीहरुको सहभागिता रहेको थियो ।