नारायणगढको खोला किनारमै बधशाला

चितवन, असार २३-

भरतपुर महानगरपालिकाले शनिबार नारायणगढ बजारमा रहेका पशु बधशालाहरुको स्थलगत अनुगमन गरेको छ । भरतपुर महानगर उपमेयर चित्रसेन अधिकारीको नेतृत्वमा रहेको एक टोली शनिबार बिहान ३ बजे बजार अनुगमन गरेको हो ।

बजारको मध्य भागमा बधशालाहरु निर्माण गरी पशु चौपाया काटेर रगत र मलमुत्र खोलामा जथाभावी फाल्ने गरेको पाइएको अनुगमन टोलीले जनाएको छ । त्यसको प्रत्यक्ष असर स्थानीय नागरिक र प्रकृतिमा परेको गुनासो आएपछि भरतपुर महानगरपालिकाले अनुगमन गरेको हो ।

नारायणगढ स्थित लङ्कु पुल आसपास र पुंगी खोला किनारमा बधशाला निर्माण गरी पशु चौपाया काट्ने बधशालाहरुको अनुगमन गरिएको नगर उपमेयर चित्रसेन अधिकारीले जानकारी दिए । ‘मुख्य बजार क्षेत्रमा बधशालाहरु निर्माण गरी पशु चौपाया काट्ने गरेको र त्यसको प्रत्यक्ष असर स्थानीयलाई परेको जनगुनासो आएपछि हामी एक्सनमा उत्रिएको हौं’ उपमेयर अधिकारीले भने । उनले भने, ‘अब हामी सरोकारवाला सहितको बैठक बसेर यसको छिनोफानो लगाउने छांै ।’

अनुगमनका क्रममा रगत, मलमुत्र तथा अन्य बिकारजन्य बस्तुहरु पुङ्गी खोलामा मिसाइएको पाइएको छ । उक्त खोला बिहान हेर्दा सधै जसो रातो हुने गरेको वडा अध्यक्ष विकास थापाले जानकारी दिए । उनले भने, ‘अब यसको निकास निस्कने गरी निर्णय गर्न हामी बाध्य हुने छौ ।’ आफू निर्वाचित भएर आएदेखि नै यस विषयमा जानकार रहेको बताउँदै अध्यक्ष थापाले जो कोही भए पनि कानुनी दायरामा आउनुपर्ने दाबी गरे ।

महानगरपालिकाले पाँच वटा बधशालाहरुको स्थलगत अनुगमन गरेको हो । अनुगमनका क्रममा पसल दर्ता, नविकरण, सरसफाइ, मलमुत्र बिसर्जन गर्ने स्थान, पशु चौपायलाई बध गर्ने तरिका, बध गर्ने स्थान पशु चौपाया राखेको स्थान भन्दा टाढा भए नभएको लगायतका अन्य विषयहरु माथि निगरानी एवम् अध्ययन गरिएको छ ।

एनिमल नेपालका प्रतिनिधि रामचन्द्र आचार्यले कुनै पनि बधशाला मापदण्डअनुसार नभएको बताए । बधशालासम्बन्धी नियमावली–२०७५ अनुसार त्यहाँ भएका कुनै पनि बधशाला मापदण्डअनुसार निर्माण गरिएको नपाइएको आचार्यले जानकारी दिए । उनले भने, ‘पशु माथि गरिने यस्ताखालका गतिविधिहरु सरासर अन्यायपूर्ण छन् ।’

बधशालासम्बन्धी नियमावली–२०७५ ले पशु चौपायालाई बध गर्नु अघि पूर्णरुपमा स्वास्थ्य चेकजाँच गरेको हुनुपर्ने, मासु काटेपछि पुन चेकजाँच गरेर मात्रै उपभोक्ता मार्फत् बजारमा लैजानुपर्ने, कोल्ड स्टोरको उचित ब्यबस्थापन हुनुपर्ने, ज्वरो आएका पशुपंक्षीलाई बध गर्न नपाइनेलगायतका नियमहरुको अधिनमा रहेर बधशाला सञ्चालन गर्न पाइने ब्यबस्था गरेको छ ।

स्थानीय बासिन्दा रामहरि तिवारीका अनुसार सबै बधशालाहरु मापदण्ड बिपरित सञ्चालन हुने गरेका छन् । ‘यहाँ भएका सबैजसो बधशालाहरु मापदण्डअनुसार निर्माण भएका छैनन्’ तिवारीले भने, ‘यसको प्रत्यक्ष असर हामीले भोग्नु परेको छ । विशेषगरी गर्मी याममा यस क्षेत्रमा दुर्गन्ध फैलने र हिडडुल गर्न समस्या आउने गरेको छ ।’

पुङ्गी खोला वडा नम्बर ३ र ४ को सिमाना हुँदै बग्ने गरेको छ । पुङ्गी खोलालाई पछिल्लो समय भरतपुर महानगरपालिकाले सौन्दर्यीकरण गरि पर्यापर्यटनका रुपमा विकास गर्ने लक्ष्य समेत लिएको छ ।

अनुगमन टोलिमा भरतपुर ३ का वडा सदस्य माधव अर्याल,एनिमल नेपालका प्रतिनिधिहरु, पत्रकार, प्रहरी, महानगर प्रहरी, सरोकारवाला निकायका प्रतिनिधिहरु, कृष्ण मार्ग शिवपथ टोल विकास संस्थाका सदस्य तथा प्रतिनिधिहरुको सहभागिता रहेको थियो ।