नेपालतर्फबाट चोयुको पहिलोपटक सफल आरोहण

काठमाडौं । आरोहणका हिसाबले निकै कठिन मानिएको चोयु हिमाल (८,१८८ मिटर)मा नेपालतर्फबाट पहिलोपटक सफल आरोहण गरिएको छ ।

पर्यटन विभागका अनुसार, नेपालतर्फबाट ६ शेर्पासहित एक विदेशी नागरिकले हालै उक्त हिमालको पहिलोपटक सफल आरोहण गरेका छन् । त्योसँगै नेपालबाट चोयु आरोहणको ढोका खुलेको छ । गएको शुक्रबार ६ शेर्पा र फ्रान्सका एक नागरिकले चोयुको सफल आरोहण गरेका हुन् ।

सेभेन समिट ट्रेक्स प्रालिका अध्यक्ष मिङ्मा शेर्पाका अनुसार, नेपालतर्फबाट नयाँ रुट (एस–एसडब्ल्यू राइड, एसएसटी नेपाल रुट) हुँदै चोयुको पहिलोपटक सफल आरोहण गरिएको छ । नेपालतर्फबाट यसअघि चोयु आरोहणको प्रयास गरिए पनि सफल हुन सकेको थिएन ।

उक्त हिमाल आरोहणका निम्ति निकै कठिन मानिन्छ । चोयु आरोहणले नेपालको साहसिक पर्यटन प्रवर्द्धनमा थप टेवा पुग्ने विश्वास लिइएको छ । चोयु हिमालको यसअघि चीनतर्फबाट मात्र आरोहण गरिँदै आएको थियो ।

विभागको पर्वतारोहण शाखाका अनुसार, उक्त आरोहण टोलीमा फ्रान्सका अलास्डिर म्याकान्जि र नेपालका गाल्जे शेर्पा, छान्वा शेर्पा, तेन्जिङ ग्याल्जेन शेर्पा, लाक्पा तेम्बा शेर्पा, लाक्पा तेन्जी शेर्पा र निग्मा ओङदा शेर्पा थिए ।

चोयु हिमाल आरोहण गरी सोमबार (हिजो) काठमाडौं आइपुगेको टोलीलाई विमानस्थल र पर्यटन बोर्डमा आयोजित कार्यक्रममा भव्य सम्मान गरियो । बोर्ड, पर्यटन विभाग र नेपाल पर्वतारोहण संघले संयुक्त रूपमा आरोही टोलीलाई सम्मान गरिएको हो ।

विभागका महानिर्देशक रुद्रप्रसाद पण्डितले नेपाली टोलीले लामो समयको प्रयासपछि कठिन, साहसिक र जोखिमपूर्ण मानिएको चोयु आरोहण गरेर नेपालको पर्वतारोहणलाई विश्वभर नयाँ सन्देश दिन सफल भएको बताए ।बोर्डका उपध्यक्ष रामप्रसाद सापकोटाले अहिलेको सफलताले अब नेपालबाटै आरोहीले चोयु आरोहण गर्न पाउने भन्दै खुसी व्यक्त गरे ।

नेपाल पर्वतारोहण संघका वरिष्ठ उपाध्यक्ष ठाकुरराज पाण्डेले पनि चोयु आरोहणको सफलताले पुनः विश्वभर नेपालको पर्यटन क्षेत्रको प्रचार हुने विश्वास व्यक्त गरे । रासस